Kryetari i Lidhjes Demokratike të Kosovës (LDK), Lumir Abdixhiku ka shkuar te Kulla e Jasharajve, në 27 vjetorin e Epopesë së UÇK-së për të nderuar sakrificën sublime të Adem Jasharit, familjes Jashari e nëpërmjet tyre dhe gjithë të rënëve në altarin e lirisë.

Ai tha se të kujtosh e shënosh Epopenë e UÇK-së, do të thotë të kujtosh e shënosh vet fundamentin e shtetit të Kosovës dhe përpjekjes sonë kolektive për liri, shkruan Arbresh.info.

“Do të thotë të kujtosh e shënosh gjithë sakrificën, qëndresën e vet kushtrimin e popullit të tonë të reflektuar në një familje të vetme, atë që sot na qëndron si tempull peligrinazhi për brezat e rinj, e që një çerek shekulli më parë na qëndronte si thirrje e rrugës sonë finale drejt lirisë.”, u shpreh ai.

“Qëllimi i shuarjes së trungut familjar të Jasharajve, një çerek shekulli më parë, ishte qëllim i shuarjes së vet popullit shqiptar në Kosovë.”, shtoi Abdixhiku.

Sipas tij, qëndresa e tyre atëherë, ishte rilindje e jona kombëtare.

“Rilindja e tyre sot, si familje, mes brezave të rinj pasardhës të Jasharajve, është qëndresë e jona që na mbanë neve në rrugën përpara.”, tha mes të tjerash kreu i LDK-së./Arbresh.info/